Muxicas

MUXICAS

O folc máis tradicional

PRESENTACIÓN

A páxina web de Muxicas creouse para ofrecer un servizo en tres aspectos que cremos fundamentais: o educativo, o cultural e o informativo.

Na función informativa promovemos o coñecemento da historia deste colectivo desde a veracidade da posición de primeira persoa que representamos. Deste xeito garantimos poñer luz sobre informacións erradas que circulan desde publicacións con datos non contrastados. Tamén a nosa realidade tropeza coa fonte do boca a boca que, como tantas veces, adoece de falla de veracidade. Estes factores deforman a realidade primixenia dos feitos acontecidos, así como dos valores promovidos e os obxectivos marcados para acadar os fins que se pretenderon. Isto debe ser corrixido e aquí é onde se fai, ao tempo que se asegura un dos fins últimos desta publicación, que é transmitir datos fieis á realidade e que axuden a entender a historia e os procesos creativos de Muxicas, que en moitos casos abriron camiños inexplorados e que aínda hoxe, dezasete anos despois do cese da nosa actividade, non se comprenden moi ben.

Na función cultural traballamos desde a web o coñecemento e posta en valor da cultura propia, tarefa exteriorizada dende o grupo traballando coa música tradicional recollida polo propio grupo, cos cancioneiros galegos e con composicións propias respectuosas con estas fontes e estas formas culturais; e como non, facendo festa ao xeito noso.

Na función educativa estamos a poñer a disposición dos usuarios e usuarias da web unidades didácticas consistentes nas partituras do corpus musical de Muxicas, sendo transcritos para este fin, con plena garantía de veracidade, arredor de cen temas que o grupo gravou ao longo da súa historia, e corrixe as moitas versións que circulan e non reflicten con fidelidade a realidade do que se fixo. Ao tempo a web esténdese na explicación da instrumentación empregada para cada un deles, e nos casos máis complexos tamén a harmonización, para que, con toda esta información, poida executarse por quen así o queira facer todo ese repertorio, ao tempo que se dan as claves de como se creou toda esa conxunción musical para que outros e outras poidan utilizar ese coñecemento como base para as súas propias composicións ou arranxos. As gravacións sonoras cumpren a función de material de apoio para acadar a plena comprensión dentro das unidades didácticas, así como parte do material videográfico e fotográfico que contextualizan moitos dos textos.

Estes servizos ofrécense para quen lle poida interesar, de balde e sen ningún ánimo de lucro ou intercambio económico, aínda tendo rexeitado ofertas de edición impresa que non están dentro dos nosos fins, que son os xa expostos, mais coa condición irrenunciable do acceso universal e gratuíto á información que tantas veces se nos ten demandado e que os tempos actuais e as tecnoloxías propias deles permítennos ofrecela agora respectando todos eses principios irrenunciables, ao tempo que abrimos unha canle de comunicación bidireccional desde varias seccións da web de xeito que poidamos recibir as vosas suxerencias, opinións, peticións de información detallada, partituras concretas e todas as cuestións que vos poidan ir xurdindo e que esperamos poder resolver.

O equipo de dirección e redacción

 

 

SORTEO  DISCOS  MUXICAS

O día 27 de Novembro publicamos no facebook de Muxicas unha nova que producíu unha grande resposta pola vosa parte, con miles de contactos que vos agradecemos moito.

Como vén aí o Nadal, anunciamos a nosa decisión de agasallarvos con unhas pequenas xoias: Dous discos en vinilo de Muxicas, sacados de entre as últimas copias que gardamos no noso arquivo sen estrear.

– “O Demo Fungón” en conmemoración dos 30 anos da súa 1ª edición no 1988 e do que xa temos ao voso dispor as partituras e toda a información nesta web

– “Desafinaturum” para celebrar que nestes días vimos de actualizar a web con toda a información tamén deste disco do 1990: Intérpretes, Autores, Arranxistas, Instrumentacións, Partituras, novos audios redixitalizados en alta calidade, Galerías fofográfias, Galerías de documentos, etc. Buceade pola web e atoparedes cousas que de seguro resultaranvos moi interesantes.

Na publicación do noso facebook puxemos unhas sinxelas condicións para participar no sorteo e dispuxemos a data do 17 de Decembro do 2018 para publicar o nome dos dous ou dúas gañadoras do concurso. Se cumprides cos sinxelos requisitos propostos, estade atentos e atentas a este apartado da web. Xusto aquí se publicarán os nomes dos ou das afortunadas.

 

OS DISCOS SON PARA…

– “O Demo Fungón”: 

– ”Desafinaturum”: 

Sorte e a disfrutalos.

· · · · · · · · · · · · · · · · ·

A nosa páxina web está en proceso constante de elaboración e actualización. Iranse engadindo novos textos, arquivos, partituras, vídeos, audios … a medida que se vaian desenvolvendo.

 

Estade atentos!

DISCOGRAFÍA OFICIAL

Falas con nós?

Contacto

Contacta con nós

 

Código: 12794